|
غذائی بحران۔حکمران طبقہ بِچ کوئی بی ہک مناسب زرعی پالیسی بڑانڑا دا ماہر نہی
لیکھک :اختر نعیم
|
|
پاکستان ہک زرعی ملخ اے، جد اسی آخدے آں ملخ دی ستر فیصد آبادی کسی نہ کسی حوالے نال زراعت تے انحصار کردی اے تے فِر کہہ وجہ اے کہ آئے دیہاڑے پاکستان زرعی بحران دا شکار ہوجُلدے۔
لازمی گل اے کہ پاکستان دے حکمران طبقہ بِچ کوئی بی ہک مناسب زرعی پالیسی بڑانڑا دا ماہر نہی۔ ( بلا تخصیص ،کوئی بی پارٹی اقتدار بچ ہووے) دراصل اس حوالے نال کوئی بی حکومت نہی سوچدی، کسان بے چارہ کہہ کرے اس دی آواز اُتے نہی پہنچدی، ہک عام کسان کول بیٹھ کے ای تے اس دی رائے کہن کے ای بہترین زرعی پالیسی بنڑ سکدی اے ورے اس بارے کسی بی پارٹی نوں توفیق نہی ہوئی کہ اوہ اس تے غور کرسکے۔
پہلے تے ایہہ گل دیخڑاں پے سی کہ کسان دی محنت دا فیدہ کِتھوں شروع ہوکے کِتھے تک جُلدے۔
کسان ڈَوگیاں بچ کم کردے، ٹھنڈ ہووے یا گرمی دی تیز تُہپ کسان ہر ویلے آپڑیں ڈوگیاں (کھیتاں) بچ موجود ہوندے۔
کسان دی محنت نال ٹیکسٹائل مِلز چلدیاں ہن، کسان دی محنت نال شوگر ملز چلدیاں ہن، کسان دی محنت نال آٹے دی ملز چلدیاں ہن۔ اسی طراں ہور مُچ ساری مصنوعات دے کادخانے چلدے ہن۔ دوئے پیاسے باغات دے فیدے بی دیخو۔
کسان دی محنت نال مختلف کارخانے چلدے ہن تے انہاں دی وجہ نال کروڑاں لوکاں نوں روزگار ملدے، کدی کسی حکومت سنجیدگی نال اس بارے نہی سوچیا کہ جہڑا کسان کروڑاں لوکاں دے روزگار دا ذریعہ بنڑدے اس کولوں بی پُچھو کہ تساں دے کہڑے کِہڑے مسائل ہن۔
اگر کسان دے مسائل تے سنجیدگی نال غور کرکے زرعی پالیسی بڑائی جُلے تے کدی بی غذائی بحران پیدا نہ ہوسی۔
ماضی دی ہک دو مثالاں سامڑے ہن کہ بھٹو مرحوم دی حکومت بچ غذائی بحران پیدا ہوگیا آسا لوک آٹے، چینی تے بناسپتی کہے(گھی) واسطے لمیاں لمیاں لیڑاں ہوندیاں آسیاں، ہک عجیب افراتفری دا دور آسا، آٹا چینی تھوڑے تھوڑے ملدے آسے، پریشانی ای پریشانی آسی۔ فر ضیاءالحق دا دور آیا شروع بچ حالات کنٹرول کرنا تے ٹَیم لگیا فِر آٹا چینی وغیرہ وافر ہوگئے لوکاں دی جان راشن دی دکاناں توں چھٹ گئی، تساں نوں یاد ہوسی کہ جدوں آیٹمی دھماکے کیتے گئے تے امریکہ وغیرہ سُنڑ پاکستان دی امداد بند کر چھوڑی، اس ویلے دے وزیراعظم سُنڑ ہک نعرہ لایا کہ ،،آپڑاں اُگاؤ تے آپڑاں کھاؤ،، قوم سُنڑ اس دی آواز تے لبیک آخیا تے اس سال پاکستان بِچ کنڑک(گندم) دی ریکارڈ پیداوار ہوئی، پاکستان دی اوہ کنڑک باہر دے ملخاں بچ بی گئی۔ ایہہ سارا کُج کسان دی محنت تے اللہ دی رحمت نال ہویا۔ امریکہ تے اس دے اتحادیاں سوچیا کہ اگر حکومت پاکستان دی ایہی پالیسی ہوئی اور پاکستان دے کسان دا ایہی جذبہ ہویا تے پاکستان آپڑیں پَیر تے کھَل جلسی، آخر امریکہ تے اس دے اتحادیاں نوں اقتصادی پابندی ختم کرنا پئی۔
وجہ صاف ظاہر اے کہ اس ویلے دی حکومت سُنڑ کسان دے مسائل نوں سمجھ کے مناسب پالیسی بڑائی آسی۔
ایہہ گل ظاہر اے کہ ہک واری غلط پالیسی بنڑ جُلے تے اس دے اثرات مُچ سالاں تک ہوندے ہن۔
زرعی قرضے کسان دے مسائل دا حل نہی ہن۔ اگر زرعی مداخل کھاد وغیرہ کسان نوں کہٹ قیمت تے ملدے رہوِن تے کسان زرعی مداخل دا چنگا استعمال کرسی جس دا لازمی اثر پیداوار تے پے سی۔ اس طراں کسان خوشحال ہوسی جدوں خوشحال ہوسی تے کارخانے بی چنگے ہوسن لوکاں نوں روزگار بی مِلسی برآمدات بی ہوسِن ملک بچ زرمبادلہ بی آسی۔ پاکستان آپڑیں پَیراں تےکَھل سی تے پاکستان بچ استحکام بی ہوسی۔
اگر پاکستان نوں ترقی دے رستے تے گامزن کرنا اے کسان واسطے ترقی پسند پالسی بڑانڑی پے سی۔ اسمبلیاں بچ کسان نوں بی مخصوص نشست دیڑیں پے سی۔
بدقسمتی نال اساں دی حکومتاں سرمایہ داراں واسطے سوچدی اے جاگیداراں واسطے سوچدی اے، کارخانے داراں واسطے سوچدی اے ورے جس جائی توں ملخ دی معیشت دی ترقی شروع ہوندی اے اس تے خاص نظر کوئی نہی۔
سیاست دان ہڑتال کردے ہن آپڑیں کرسی واسطے ، انہاں کدی کسان واسطے ہڑتال یا احتجاج نہی کیتا۔ یاد رخو اگر کدی کسان متحد ہوکے ہڑتال تے آگئے تے اس ویلے بڈا بحران پیدا ہوجُلسی۔ کسی سیاست دان نوں فر دوڑنا دا موقع نہ مل سی۔
ضرورت اس گل دی اے خوراک دے بحران تو بچڑاں واسطے سیاست داناں نوں مل کسان دی فلاح واسطے کَم کرنا پے سی۔
باقی گلاں فِر۔
|
|
|
